O día 5 de abril, no Coliseo Noela, asistimos a posta en escena da obra Verán
en Decembro de Carolina África, representada por cinco alumnas de
Bacharelato do I.E.S. "Virxe do Mar", esplendidamente dirixidas polo
profesor de grego Carlos Maquieira, coa colaboración da profesora Gloria Rivas,
encargada da escenografía e o vestiario.
Coma tódolos anos no transcurso da Semana Cultural, Noia ten unha cita co
teatro, do máis alto nivel, da man dun elenco de actrices este ano ( e actores,
tamén, nos pasados) que se entregan durante todo un ano, co seu profesor,
tradutor da obra e director, para brindar ao público, no espazo dunha noite,
un espectáculo case profesional.
Verán en decembro é unha reflexión sobre os
problemas da sociedade actual: a convivencia no fogar de catro xeracións de
mulleres, que afrontan, día a día, traballo precario, relacións amorosas pouco
satisfactorias e o coidado dunha avoa dependente, con todo o afecto e as
tensións que tal situación xera, nunha familia na que somos quen de
recoñecérmonos cada un(ha) de nós . Trátase do soño de fuxir, en medio
dun inverno tan prolongado, cara un verán liberador, que chega finalmente
de xeito sutil e inesperado, botando por terra calquera consideración previa.
E unha vez máis, Carlos consegue facer do teatro unha arma potentísima de
expresión, capaz de liberar a palabra nos seus artistas. Resulta un auténtico
luxo ver a estas rapazas dominar a escena e percibir a súa alegría ao facelo.
Moitísimos parabéns para toda a "troupe".
